हिंदजागर न्यूज, प्रतिनिधी – पुणे – सध्या सर्वत्र नवरात्रीचा उत्सव सुरु आहे. पुण्यातही नवरात्रीचा जल्लोष दिसून येत आहे. गणेशोत्सवाप्रमाणेच दुर्गोत्सवात देखील पुण्यात धमाल असते. नवरात्रोत्सवानिमित्त शहरातील विविध मंदिरांत भाविकांची मोठी गर्दी होती.भाविकांची होणारी गर्दी लक्षात घेता वाहतूक शाखेतर्फे मोठा निर्णय घेण्यात आला आहे. या निर्यानुसार, वाहतुकीत बदल करण्यात आला आहे. त्यानुसार, शहरातील काही मार्ग नवरात्रीदरम्यान बंद राहतील. या मार्गावरील वाहतूक पर्यायी मार्गाने वळवण्यात आली आहे.
नवरात्री उत्सवात दरवर्षी शहरातील श्री चतु:शृंगी मंदिर, भवानी पेठेतील श्री भवानी माता मंदिर, श्री तांबडी जोगेश्वरी मंदिर, तसेच सारसबाग येथील श्री महालक्ष्मी मंदिरात दर्शनासाठी भाविकांची मोठ्या प्रमाणात गर्दी होते. याचा वाहतुकीवर होणारा परिणाम लक्षात घेता परिसरातील वाहतुकीत बदल करण्यात आला आहे. या भागातील रस्ते वाहतुकीसाठी 12 ऑक्टोबरपर्यंत बंद करण्यात आले असून येथील वाहतूक ही पर्यायी मार्गाने वळवण्यात आली आहे.
असा आहे वाहतुकीतील बदल
लक्ष्मी रस्त्यावरील गणपती चौक ते तांबडी जोगेश्वरी मंदिर दरम्यानचा रस्ता हा वाहतुकीसाठी बंद ठेवला जाणार आहे. अप्पा बळवंत चौक ते बुधवार चौक (हुतात्मा चौक) दरम्यानचा रस्ता वाहतुकीस बंद राहील. तर बुधवार चौक ते अप्पा बळवंत चौक अशी एकेरी वाहतूक सुरू राहणार आहे. यासह श्री तांबडी जोगेश्वरी मंदिर, शनिवार पेठेतील श्री अष्टभुजा मंदिर, नारायण पेठेतील श्री अष्टभुजा मंदिर परिसरात पार्किंग प्रतिबंधित राहणार आहे. त्याऐवजी नदीपात्रातील रस्ता, मंडईतील वाहनतळ येथे वाहने पार्क करता येईल.
सेनापती बापट रस्ता- सेनापती बापट रस्त्यावरील वाहतुकीत देखील बदल करण्यात आला आहे. या मार्गावरील श्री चतुःशृंगी मंदिर परिसरात हा बदल करण्यात आला आहे. या मार्गावर वाहतूक कोंडी झाल्यास येथील वाहतूक ही पत्रकारनगर चौकातून वळवण्यात येणार आहे. तर सेनापती बापट रस्त्याकडे येणारी वाहतूक शिवाजी हाउसिंग सोसायटी चौकातून सेनापती बापट रस्त्याच्या डाव्या बाजूने एकेरी करण्यात येणार आहे. गर्दीची स्थिती लक्षात घेता वेताळबाबा चौकातून, दीप बंगला चौकातून, ओम सुपर मार्केटमार्गे गणेशखिंड रस्त्याकडे वहतूक वळविण्यात येईल. तर चतु:शृंगी मंदिरात दर्शनासाठी येणाऱ्या भावीकांना पॉलिटेक्निक मैदानावर वाहनांची पार्किंग करता येणार आहे.
भवानी पेठ- भवानी पेठेतील श्री भवानी माता मंदिर परिसरातील वाहतूकीत देखील बदल करण्यात आले आहे. त्यानुसार, रामोशी गेट चौक ते जुना मोटार स्टँड दरम्यानची वाहतूक बंद राहील. यासह मंदिर परिसरात पार्किंग बंदी राहील. या दरम्यान, पर्यायी मार्ग नेहरू रस्ता राहील.
Repoter – प्रदीप कांबळे.
